СЛАВА :

ПСАЛОМ 4
1. Конець, песни, п(са)л(о)мъ д(а)в(и)д(о)въ.

2. Внегда возвахъ, оуслыша мя б(ож)е правды моея, вь скорби
распространилъ мя еси, помилоуи мя, оуслыши м(о)л(и)твоу мою.
3. С(ы)н(о)ве ч(е)л(о)в(е)чьстии, доколе тяжькосердии; вьскоую любите
соуетная, и ищете лжа;
4. И оувидите, яко оудиви г(оспод)ь пр(е)п(о)д(о)бн(а)го своего, г(оспод)ь
оуслышит мя, внегда зовоу к немоу.
5. Гневаитеся, и не согрешаите, яже г(лаго)л(е)те вь с(е)рдцехъ
вашихь, на ложихь ваших оумилитеся.
6. Пожрите жертвоу правде, и оуповаите на г(оспод)а.
7. Мнози г(лаго)лять: кто явить намь бл(а)гая; знаменася на нас светъ
лица твоего, г(оспод)и.
8. Далъ еси веселие вь с(е)рдци моемь: от плода пшеница, вина и елея
своего оумножишася.
9. Въ мире вкоупе оусноу и почию, яко ты г(оспод)и, единого на
оупование вселилъ мя еси.

ПСАЛОМ 5
1. В конець, о наследьствоующии,п(са)л(о)мь д(а)в(и)д(о)в

2. Г(лаго)лы моя вноуши г(оспод)и, разоумеи звание мое.
3. Вонми глас м(о)л(и)твы моея, ц(а)рю мои и б(ож)е мои,

яко к тобе помолюса г(оспод)и.
4. Заоутра оуслыши глас мои: заоутра предстаноу ти, и оузриши мя.
5. Яко б(ог)ъ не хотя безакон(и)е, ты еси: не приидеть к тобе лоукавноуяи.
6. Ни пребоудоут же законопрестоупници пред очима твоима:
вьзненавиделъ еси вся творящая безаконие.
7. Погоубиши вся г(лаго)л(ю)щая лжю: моужа крови и льсти гноушается г(оспод)ь.
8. Аз же множьствомь м(и)л(о)сти твоея, внидоу в домь твои, поклонюся кь
ц(е)ркви с(вя)теи твоеи, вь страсе твоемь.
9. Г(оспод)и, настави мя правдоую твоею, врагъ моихь ради
исправи пред собою поуть мои.
10. Яко нес(ть) вь оустехь их истины, с(е)рдце ихь соуетно,
гробъ отверстъ гортань ихь, языкы своими лщахоу.

11. Соуди имь б(ож)е, да отпадоуть от мыслеи своихь, по множьствоу
неч(е)стья ихь изрени я, яко прогневаша тя г(оспод)и.
12. И вьзвеселятся вси оуповающеи на тя, вь векы вьзрадоуюся:
и вселишися в них, и похвалятся о тобе любящеи имя твое.
13. Яко б(лаго)сл(о)виши праведника г(оспод)и, яко ороужьемь бл(а)говоления
венчалъ еси нас.

ПСАЛОМ 6
1. Конець, вь песнех, о осмеи, п(са)л(о)мъ д(а)в(и)д(о)въ.

2. Г(оспод)и, не яростью твоею обличи мене, ни гневомь твоимь покажи мене.
3. Помилоу мя г(оспод)и, яко немощенъ есмь: исцели мя г(оспод)и,
яко смоутишася кости моя,
4. И д(у)ша моя смоутися зело, и ты г(оспод)и доколе;
5. Обрати г(оспод)и, и изми д(у)шю мою: сп(аси) мя ради м(и)л(о)сти твоея:
6. Яко несть вь см(е)рти поминаяи тобе, въ аде же кто исповестьтися;
7. Оутроудихся вьздыханьемь моимь, измыю на всякоу нощь ложе мое,
слезами моими постелю мою омочю.
8. Смятеся от ярости око мое, обетшахъ во всехъ вразехъ моихъ.
9. Отстоупите от мене вси творящеи безаконье,
яко оуслыша г(оспод)ь глас плача моего:
10. Оуслыша г(оспод)ь моленье мое, г(оспод)ь м(о)л(и)твоу мою приятъ.
11. Да постыдятся и смятоутся вси врази мои, възратятся, и
оустыдятся зело вьскоре.

СЛАВА :

ПСАЛОМ 7
1. П(са)л(о)мъ д(а)в(и)д(о)в, егоже вьспети г(о)с(поде)ви,
о словесех хоусеевъ, с(ы)на еминниина.

2. Г(оспод)и б(ож)е мои, на тя оуповахъ,
сп(а)с(и) мя от всехъ гонящихъ, избави мя.
3. И да не когда похитить яко левь д(у)шю мою,
не соущю избавляющю, ниже сп(а)сающю.
4. Г(оспод)и б(ож)е мои, аще створихъ се, аще есть неправда в роукоу моею:
5. Аще вьздахь вьзъдающим ми зла, да отпадоу оубо от врагъ моихь тощь.
6. Да поженеть оубо врагъ д(у)шю мою, и постигнеть, и попреть в
земьлю животъ мои, и славоу мою в персть вселить.
7. Вьскр(ес)ни г(оспод)и гневомь твоимь, вьзнесися в концих
врагъ твоихъ, вьстани г(оспод)и б(ож)е мои повеленьем, имже заповеда.
8. И снемь люди обыдеть тя: и о томь на высотоу обратися.
9. Г(оспод)ь соудить люд(е)мь: соуди ми г(оспод)и по правде мо[е]и,
и по незлобе моеи на мя.
10. Да скончается злоба грешных, и исправиши праведнаго,
испытая с(е)рдца и оутробы б(ож)е праведна.

11. Помощь моя от б(ог)а, сп(а)сающаго правыя с(е)рдцемь.
12. Б(ог)ъ соудитель праведенъ, и крепокъ, и долготерпеливъ, и не
гневь наводя на всякъ д(е)нь.
13. И аще не обратитеся, ороужье свое очестить,
лоукь свои напряже, и оуготова и:
14. И в немь оуготова ссоуды см(е)ртныя, стрелы с горющими сдела.
15. Се боле неправдоу, зачатъ болезнь, и роди безаконие:
16. Ровъ изры, и ископа и, и впадется вь ямоу, яже створи.
17. Обратится болезнь его на главоу его, и на верхъ его неправда его снидеть.
18. Исповемся г(о)с(поде)ви по правде его, и пою имени г(оспод)ню вышнемоу.

ПСАЛОМ 8
1. В конець, о точилех, пс(а)л(о)м д(а)в(и)д(ов).

2. Г(оспод)и г(оспод)ь нашь, яко чюдно имя твое по всеи земли, яко вьзятся
велелепота твоя превыше н(е)б(е)съ.
3. Из оустъ младнець и съсоущих свершилъ еси хвалоу,
врагъ твоихъ рад(и), разроушиши врага и местьника.
4. Яко оузрю небеса, дела перстъ твоихъ, лоуноу и звезды, яже ты основа.
5. Что есть ч(е)л(о)в(е)кь, яко помниши и; или с(ы)нъ ч(е)л(о)в(е)чь,
яко посещаеши и;
6. Оумнилъ еси и маломь чимь от анг(е)лъ, славою и ч(е)стью венчалъ еси его:
7. И постави еси его над делы роукоу твоею, вся покорилъ еси под нозе его:
8. Овца и волы вся, еще же и скоты польскыя:
9. Птица н(е)б(е)сныя, рыбы морьскыя, преходящая стезя морьскыя.
10. Г(оспод)и г(оспод)ь нашь, яко чюдно имя твое по всеи земли.

СЛАВА :

К А Ф (И З М А) В Т О Р А Я

ПСАЛОМ 9
1. В конец, о таиных с(ы)на, п(са)л(о)мъ д(а)в(и)д(ов).

2. Исповемся тобе г(оспод)и всемь сердьцемь моимь, повемь вся чюдеса твоя.
3. Възрадоуюся и вьзвеселюся о тобе: поя имени твоемоу, вышни.
4. Внегда вьзвратитися врагоу моемоу вьспять, изнемогоуть,
и погибноуть от лица твоего.
5. Яко створилъ еси судъ мои, и прю мою: селъ еси на престоле, соудяи правдоу.
6. Запретилъ еси языкомь, и погибе неч[ес]тивыи,
имя его потребилъ еси вь векъ, и векь века.
7. Врагоу оскоу[де]ша ороужья въ конець, и грады разроушилъ еси,
погибе память его с шюмомь.
8. И г(оспод)ь пребываеть вь векы,оуготова на соуд престолъ свои.
9. И тъ соудить вселенеи вь правдоу, соудить людемь вь правотоу.

10. И быс(ть) г(оспод)ь прибежище оубогомоу,
помощникъ вь бл(а)го время, в печалех.
11. И да оуповають на тя знающеи имя твое, яко не оставилъ еси вьзискающих
тобе г(оспод)и.
12. Поите г(осподе)ви, живоущемоу в сионе: вьзвестите вь языцехъ начи[на]ния его:
13. Яко вьзыская крови ихъ помяноу, не забы званья оубогых.
14. Помилоуи мя г(оспод)и, виждь смиренье мое от врагъ моихъ,
вьзносяи мя от вратъ см(е)ртныхъ.
15. Яко да вьзвещю вся хвалы твоя во вратехъ дщери сиона:
вьзрадоуемся о сп(асе)ньи твоемь.
16. Оуглебоша языци вь пагоубе, юже створиша: въ сети сеи,
юже скрыша, оувязе нога ихъ.
17. Знаемь есть г(оспод)ь соудьбы творя, вь делехъ роукоу своею оувязе грешникъ.
18. Да вьзвратятся грешници въ адъ: вси языци забывающеи б(ог)а.
19. Як(о) не до конца забовенъ боудеть нищии, терпение
оубогыхъ не погибнеть до коньца.
20. Вьскр(ес)ни г(оспод)и, да не крепится ч(е)л(о)в(е)къ,
да соудятся языци пред тобою.
21. Постави г(оспод)и законодавца над ними, да разоумеють языци,
яко ч(е)л(о)в(е)ци соуть.
22. Вьскоую г(оспод)и отстоя далече презриши в бл(а)го время, в печалехъ;
23. Въ гордости неч[е]стиваго, вьзгарается нищии:
и оувязаеть вь с[о]ветехъ, яже помышляеть.
24. Яко хвалимь есть грешныи в похотехъ д(у)ша своея, и обидяи бл(а)гословимь.
25. Раздражи г(оспод)а грешныи, по множьствоу гнева своего
не взищеть: нес(ть) б(ог)а пред нимь:
26. Оскверняются поутье его на всяко время: отемлются соудбы твоя от лица ег(о),
всемь врагомь своимь оудолееть.
27. Реч(е) бо вь с(е)рдци своемь: не подвижюс[я] от рода в род бе[з] зла.
28. Емоу же клятвы оуста его полна соуть, и горести и льсти:
под языкомь его троуд и болезнь.
29. Преседить в лаателехъ с богатыми вь таиныхъ, оубити неповинаго:
очи его на нищаго призираете.
30. Лаеть в таинных яко левь вь ограде своеи: лаеть вьсхитити нищаго,
всхитити оубогаго внегда привлещи и в сети своеи.
31. Смирить и: преклонится и падеть, егда оудолееть оубогымь.
32. Рече бо вь с(е)рдци своемь: забы б(ог)ъ, отврати лице свое,
да не видить до коньца.
33. Вьскр(ес)ни г(оспод)и б(ож)е мои, да вьзьнесется роука твоя,
не забоуди нищихъ своихъ до конца.
34. Чьсо ради прогнева неч[ес]тивы б(ог)а; рече бо вь с(е)рдци своемь: не взищет.
35. Видиши, яко ты болезнь и ярость смотряеши, да преданъ боудеть въ роуце твою:
тобе оставленъ есть нищии, сироу ты боуди помощникъ.
36. Скруши мышцю грешномоу и лоукавомоу: взищется грехъ его,
и не обрящется.
37. Г(оспод)ь ц(а)рь вь векы и векъ века: погыбнете языци от земля его.

38. Желанье оубогых оуслышалъ еси г(оспод)и,
оуготование с(е)рдца ихъ внятъ оухо твое.
39. Соуди ти сироу и смиреноу, да не приложи потомь
величатися ч(е)л(о)в(е)коу на земли.

ПСАЛОМ 10
В конець, п(са)л(о)мъ д(а)в(и)д(о)въ

1. На г(оспод)а оуповахъ, како речеть д(у)ши моеи: привитаи по
горамь яко птица;
2. Яко се грешници напрягоша лоукъ, оуготоваша стрелы в тоуце,
сьстреляти вь мраце правыя с(е)рдц(е)мь.
3. Зане яже ты сверши, они разроушиша: праведьникъ ж[е]
что створи; г(оспод)ь вь ц(е)ркви с(вя)теи своеи.
4. Г(оспод)ь, на н(е)б(е)се пр(е)ст(о)лъ его: очи его на нищаго призираете,
вежди его испытаете с(ы)ны ч(е)л(овечь)скыя.
5. Г(оспод)ь испытаеть праведнаго и неч(ес)тиваго:
любяи же неправдоу, ненавидить своея д(у)ша.
6. Одъждить на грешникы сети, огнь и жюпелъ, и д(у)хъ боуренъ, часть чаша ихъ.
7. Яко праведенъ г(оспод)ь, и правдоу вьзлюби, правая виде лице его.

СЛАВА :

ПСАЛОМ 11
1. В конець, о осмии, п(са)л(о)м д(а)в(и)д(ов).

2. Сп(аси) мя г(оспод)и, яко оскоуде пр(е)п(о)д(о)бныи, и яко
оумалишася истины от с(ы)новь ч(е)л(о)в(е)чьскыхъ.
3. Соуетная г(лаго)ла кождо искренемоу своемоу: оустны льстивыя
вь с(е)рдци, и вь с(е)рдци г(лаго)л(а)ша злая.
4. Потребить г(оспод)ь вся оустны льствыя, языкъ велеречивъ.
5. Рекша: языкъ нашь възвеличимь, оустны наша при насъ соуть:
кто намъ г(оспод)ь есть;
6. Страсти ради нищих, и вьздыхания оубогых, ныне вьскр(ес)ноу,
гл(аголе)ть г(оспод)ь: положюс(я) вь сп(асе)нье, и не обиноуюся о нем.
7. Словеса г(оспод)ня словеса чиста, сребро раждежено, искоушено
земли, очищено седморицею.
8. Ты г(оспод)и сохраниши ны, и сьблюдеши ны от рода сего и вь векы.
9. Окр(е)стъ неч[ес]тивии ходять: по высоте твоеи оумножилъ еси
с(ы)ны ч(е)л)о)в(е)чьскыя.

ПСАЛОМ 12
1. В конець, п(са)л(о)мъ д(а)в(и)д(о)въ.

2. Доколе г(оспод)и забоуд(е)ши мя до [ко]нца; доколе отвращаеши
лице свое от мене;

3. Доколе положю с[о]веты вь д(у)ши моеи, болезни вь с(е)рдци моемь
д(е)нь и нощь; доколе вьзнесется врагъ мои на мя;
4. Призри на мя, оуслыши мя г(оспод)и б(ож)е мои, просвети очи мои,
да не когда оусноу вь см(е)рть.
5. Да не когда речеть врагъ мои: оукрепихся нань.
6. Стоужающеи ми вьзрадоуются, аще ся подвижю.
7. Аз же на м(и)л(о)сть твою оуповахъ. възрадоуется с(е)рдце мое о сп(асе)ньи
твоем: въспою г(осподе)ви бл(а)годеявшемоу мне, и пою имени г(оспод)ню,
вышнемоу.

ПСАЛОМ 13
П(са)л(о)мъ д(а)в(и)д(о)въ, в конець.

1. Рече безоуменъ вь с(е)рдци своемь: нес(ть) б(ог)а. растлеша и омразишася
в начинани[и]х: нес(ть) творяи бл(а)гостыня.
2. Г(оспод)ь сь небесе приниче над с(ы)ны ч(е)л(о)в(е)чьския, видети,
аще есть разоумеваяи, или взиская б(ог)а.
3. Вси оуклонишася, вкоупе неключими быша: нес(ть) творяи
бл(а)гостыня, нес(ть) до единаго.
4. Ни ли разоумеють вси делающеи безаконие, снедающеи люд(и) моя
вь хлеба место; г(оспод)а не призваша:
5. Тамо оубояшася страха, идеже не бе страха, яко г(оспод)ь в роде праведных.
6. С[о]ветъ нищаго посрамисте, г(оспод)ь же оупование его есть.
7. Кто дасть от сиона сп(асе)ние из(раи)л(е)во;
8. Вьнегда вьзратить г(оспод)ь пленение людии своихъ, вьзрадоуется
ияковъ, и вьзвеселится из(раи)ль.

СЛАВА :

ПСАЛОМ 14
В конець, п(са)л(о)м д(а)в(и)д(о)в.

1. Г(оспод)и, кто обитаеть в жилищи твоемь; ли кто вселится вь
с(вя)тоую гороу твою;
2. Ходяи бесъ порока, и делаяи правдоу, г(лаго)ляи истиноу вь с(е)рдци своемь:
3. Иже не оульсти языкомь своим, и не створи искренемоу своемоу зла,
и поношения не приятъ на ближьняя своя.
4. Оуничиженъ есть пред нимь лоукавыи, боящая же ся г(оспод)а славить:
кленыися искренемоу своемоу, и не отметаяся.
5. Сребра своего не дасть въ лихвоу, и мьзды на неповинныхъ не приятъ:
творяи сия не подвижится в векы.

ПСАЛОМ 15
Столпотворение, п(са)л(о)мъ д(а)в(и)д(о)в.

1. Съхрани мя г(оспод)и, яко на тя оуповахъ.
2. Рехъ г(осподе)ви: г(оспод)ь мои еси ты, яко бл(а)гыхъ моихъ не требоуеши.
3. С(вя)тымь, иже соуть на земли его, оудиви г(оспод)ь вся хотения
своя в нихъ.
4. Оумножишася немощи ихъ, по сих оускориша. не сбероу с[о]борь ихъ
от крови, ни помяноу же именъ ихъ оустнама моима.
5. Г(оспод)ь часть достоянья моего, и чаша моея:
ты еси оустрояи достоянье мое мне.
6. Оужа допадоша ми в державныхъ мне: ибо достоянье мое державно есть мне.
7. Б(а)г(о)с(ло)вя г(оспод)а вразоумльшаго мя:
еще же и до нощи показа мя оутроба моя.
8. Предзрехъ г(оспод)а предо мною воиноу,
яко одесноую мене есть, да ся не подвижю.
9. Сего ради вьзвеселися с(е)рдце мое, и вьзрадовася языкъ мои:
еще же и плоть моя вселится на оупование.
10. Яко не оставиши д(у)ша моя вь аде,
ни даси ж(е) пре(по)добномоу своемоу видети истления.
11. Сказал ми еси поути живота: исполниши мя веселия с лицемь твоимь:
красота в десници твои в кон[е]ць.

ПСАЛОМ 16
М(о)л(и)тва д(а)в(и)д(о)ва.

1. Оуслыши г(оспод)и правдоу мою, [в]онми моление мое, вноуши м(о)л(и)твоу
мою не вь оустнахъ льстивахъ.
2. От лица твоего соуд(ь)ба моя изыдеть: очи мои да видите правьты.
3. Искоусилъ еси с(е)рдце мое, посе[ти]лъ еси нощию:
искоусил мя еси, и не обретеся во мне неправда.
4. Яко да не вьзл(гла)г(о)лять оуста моя делъ ч(е)л(о)в(е)чьскыхъ,
за словеса оустенъ твоихъ азъ схранихъ поути жестокы.
5. Сверши стопы моя вь стезахъ твоихъ, да не подвижются стопы моя.
6. Азъ возвах, яко оуслыша мя б(ож)е: приклони оухо твое мне,
и оуслыши г(лаго)лы моя.
7. Оудиви м(и)л(о)сти твоя, сп(а)саяи оуповающих на тя от противящихся
десници твоеи:
8. Съхрани мя г(оспод)и яко зеницю ока: въ крове крилоу твоею покрыеши мя,
9. От лица неч[ес]тивых отстрастъших мя. врази мои д(у)шю мою оудержаша,
10. Тоукъ свои затвориша: оуста ихъ гл(агола)ша гордыню.
11. Изгонящеи мя ныне обыдоша мя, очи свои вьзложиша оуклонити на землю.
12. Обьяша мя яко левь готовъ на ловъ, и яко скыменъ обитая вь с[о]кровищих.

13. Вьскр(ес)ни г(оспод)и, предвари я, и запни имъ: изми д(у)шю мою от
нечьстивых, ороужья твоего от врагъ роукъ твоихъ.
14. Г(оспод)и, от мала земля разьдели я вь животе ихъ, и с[о]кровенных
твоихъ исполнися оутроба ихъ: насытишася с(ы)н(о)въ, и оставиша останки
младенцемь своимь.
15. Аз же правдою явлюся лицю твоемоу, насыщюся, внегда
явить ми ся слава твоя.

СЛАВА :

К А Ф И З М А Т Р Е Т Ь Я

ПСАЛОМ 17

1. В конець, отрока г(оспод)ня д(а)в(и)да, яже г(лаго)ла г(осподе)ви словева песни
сея, въ д(е)нь вонже избави его г(оспод)ь, из роукы враг его, и изъ роукы
cаоуля, и реч(е):
2. Възлюблю тя г(оспод)и крепости моя:
3. Г(оспод)ь оутверженье мое, и прибежище мое, и избавитель мои, б(ог)ъ мои,
помощникъ мои, оуповаю нань: защититель мои,
и рог сп(асе)ния моего, и застоупникъ мои.
4. Хваламъ призовоу г(оспод)а, и от врагъ моихъ сп(а)соуся.
5. Одержаша мя болезни см(е)ртныя, и потоци безакония смоутиша мя:
6. Болезни адовы обыдоша мя, предвариша мя сети см(е)ртныя.
7. И внегда скорбети ми призвахъ г(оспод)а, и кь б(ог)оу моемоу възвах:
оуслыша от ц(е)ркве с(вя)тыя своея глас мои, и вопль мои пред нимь
внидеть пред очима его.
8. Подвижася и трепетьна быс(ть) земля, и основания горъ смоутишася
и подвизашася, яко прогневася на ня б(ог)ъ.
9. Възыде дымъ гневомь его, и огнь от лица его вьспланется,
оуглия вьзгорешася от него.
10. И преклони н(е)б(е)са и сниде: и примракъ под ногама его.
11. И вьзыде на хероувимь, и лете, вьзлете на крилоу ветренюю.
12. И положи тьмоу заскровъ свои, окр(е)стъ его селенье его,
темна вода вь облацехъ възъдоушныхъ.
13. От облистания пред нимь облаци проидоша, град и оуглие огньно.
14. И вьзгреме сь н(е)б(е)се г(оспод)ь, и вышнии дасть глас свои,
15. Поусти стрелы, и разгна я, и мололонью оумножи, и смоути ихъ.
16. И явишася источници воднии и открышася основанья вселенныя,
от запрещенья твоего г(оспод)и, от доухъновения д(у)ха гнева твоего.
17. Посла свыше, и приятъ мя, въсприять мя от вод многъ.
18. Избавить мя от врагъ моихъ силных, и от ненавидящиихъ мя:
яко оукрепишася паче мене.
19. Предвариша мя вь д(е)нь озлобления моего: и быс(ть) г(оспод)ь оутверженье мое.
20. И изведе мя на широтоу: избавит мя, яко вьсхоте мя.

21. И вьзъдасть ми г(оспод)ь по правде моеи,
и по чистоте роукоу моею вьзъдасть ми:
22. Яко схраних поути г(оспод)ня, и не нечествовахъ от б(ог)а моего.
23. Яко вься соудьбы его предо мною, и оправданья его не отстоупиша от мене.
24. И боудоу непороченъ съ ним, и с(о)хранюся от безакония моего.
25. И възъдасть ми г(оспод)ь по правде моеи,
и по чистоте роукоу моею, пред очима его.
26. Съ препод(о)бнымь препод(о)бенъ боудеши,
и с моужемъ неповиннымь неповиненъ боудеши,
27. И со избраннымь избранъ боудеши, и [с] сътроптивымъ развратишис(я).
28. Яко ты люд(и) смиренныя сп(а)сеши, и очи гордыхъ смириши.
29. Яко ты просвещаеши светилникъ мои г(оспод)и:
б(ож)е мои, просвещаеши тмоу мою.
30. Яко тобою избавлюся от искоушения, и о б(о)зе моемь прелезоу стеноу.
31. Б(ог)ъ мои, непороченъ поуть его: словеса г(оспод)ня ражжена:
защититель есть всемь оуповающимь нань.
32. Яко кто б(ог)ъ, разве г(оспод)а; или б(ог)ъ, разве б(ог)а нашего;
33. Б(ог)ъ препояса мя силою, и пол(о)жи непорочен поуть мои:
34. Свершая нози мои яко елени, и на высокых поставляя мя:
35. Наоучая роуце мои на брань, и положи лоукъ меденъ мышцамь моимъ.
36. И дал ми еси защищенье сп(асе)ния, и десница твоя прият мя:
и наказан(и)е твое исправит мя в конець, и наказанье твое то мя наоучить.
37. Оуширилъ еси стопы моя под(о) мною , и не изнемогосте плесне мои.
38. И пожноу врагы моя, и постигноу я, и не вьзвращюся, дондеже скончаются.
39. Оскорбьлю ихъ, и не могоуть стати, падоуть под ногама моима.
40. И препоясал мя еси силою на брань, сьпялъ еси вся вьстающая на мя под мя.
41. И врагъ моихъ дал ми еси хребетъ, и ненавидящая мя потребилъ еси.
42. Възваша, и не бе сп(а)саяи: къ г(оспод)оу, и не оуслышаше ихъ.
43. И истоня ихъ яко прахъ пред лицемь ветроу, яко брение поути поглажю ихъ.
44. Избавит мя от пререкания люди, поставиши мя в главоу языкомь.
людие, ихже не видехъ работаша ми,
45. Вь слоухъ оуха оуслышаша мя: с(ы)н(о)ве чюжии солгаша ми,
46. С(ы)н(о)ве чюждии обетшаша, и охромоша от стезь своихъ.
47. Живъ г(оспод)ь, и бла(го)сл(о)в(е)нъ б(ог)ъ, и вьзнесется б(ог)ъ сп(а)сения моего:
48. Б(ог)ъ даяи отмьщение мне, и повиноуяи люди моя под мя.
49. Избавитель мои от врагъ моихъ гневливых, от вьстающих на мя
вьзнесеши мя, от моужа неправедна избавиши мя.
50. Сего ради исповемся тобе вь языцехъ г(оспод)и, и имени твоемоу пою:
51. Величая сп(асе)ния ц(а)р(е)ва, и творяи м(и)л(о)сть хр(ис)тоу своемоу
д(а)в(и)доу, и семени его до века.

СЛАВА :

ПСАЛОМ 18
В конець, п(са)л(о)мъ д(а)в(и)д(о)въ.

2. Н(е)б(е)са исповедають славоу б(ож)ию, творение же роукоу его
вьзвещает твердь.
3. Д(е)нь дни отригаеть глаголъ, и нощь нощи вьзвещаеть разоумь.
4. Не соуть речи и ни словеса, ихже не слышатся гласи ихъ.
5. Въ всю землю изыдь вещание ихъ, и в конца вселеныя г(лаго)ли ихъ.
въ с(о)лнци положи селение свое:
6. И тъ яко жених исходя от чертога своего,
вьзрадоуется яко исполинъ тещи поут(ь).
7. От конца н(е)б(е)съ исход его, и сретенье его до конца н(е)б(е)съ:
и нес(ть) иже оукрыется теплоты его.
8. Законъ г(осподе)нь непороченъ, обращая д(у)шю: сведетельство г(оспод)не
верно, оумоудряя младенца.
9. Оправдания г(оспод)ня права, веселящая с(е)рдца:
заповедь г(оспод)ня светла, просвещающи очи.
10. Страхъ г(осподе)нь чистъ, превыбая в векъ века:
соудбы г(оспод)ня истинны, оправданны вкоупе:
11. Вьжделенны паче злата и камене ч(е)стна многа, и слажьша паче меда и с[о]та.
12. Ибо рабъ твои хранить ихъ, внегда схранить ихъ вьздаяние много.
13. Грехопадения кто разоумееть; от таинных моихъ очисти мя,
14. И от чюжих пощади раба твоего: аще не оудолеють ми,
тогда непороченъ боудоу, и очищюся от греха велика.
15. И боудоут вь бл(а)говоление словеса оустъ моихъ, и поучение с(е)рдца
моего пред тобою воиноу, г(оспод)и помощниче мои, и избавителю мои.

ПСАЛОМ 19
1. В конець, п(са)л(о)м д(а)в(и)д(о)в.

2. Оуслышить тя г(оспод)ь вь д(е)нь печали, защитить тя имя б(ог)а ияковля.
3. Послеть ти помощь от с(вя(т(а)го, и от сиона застоупить тя:
4. Помянеть всякоу жертвоу твою, и всясожжения твоя тоучна боуди.
5. Даждь ти г(оспод)ь по с(е)рдцю твоемоу, и весь с[о]ветъ твои исполнить.
6. Вьзрадоуемся о сп(асе)нии твоемь, и во имя г(оспод)а б(ог)а нашего
вьзвеличимся. исполнить г(оспод)ь вся прошения твоя.
7. Ныне познахъ, яко сп(а)слъ есть г(оспод)ь х(рист)а своего: оуслышить его
с н(е)б(е)се с(вя)т(а)го своего: въ силахъ сп(асе)ние десница его.
8. Сии на колесницахъ, и сии на конехъ:
мы же во имя г(оспод)а б(ог)а нашего призовемь.
9. Ти спяти быша и падоша, мы же в[о]стахомь и прости быхомь.
10. Г(оспод)и, сп(а)си ц(а)ря, и оуслыши ны, вон[ь]же д(е)нь аще призовем тя.

ПСАЛОМ 20
1. В конець, п(са)л(о)мъ д(а)в(и)д(о)въ.

2. Г(оспод)и, силою твоею вьзвеселится ц(а)рь, и о сп(асе)нии твоемь
вьзрадоуется зело.
3. Желание с(е)рдца его далъ еси емоу, и хотение оустноу его неси лишилъ его.
4. Яко предварилъ еси его бл(аго)с(ло)веньемь бл(а)гостыннымь,
пол(о)жилъ еси на главе его венець от камене ч(е)стна.
5. Живота просил ти есть, и далъ еси емоу и долготоу днии в векъ века.
6. Велия слава его сп(асе)ниемь твоимь: славоу и велелепие вьзложиши нань.
7. Яко даси емоу бл(аго)с(ло)вение в векъ века, вьзвеселиши его радостию с
лицемь твоимь.
8. Яко ц(а)рь оуповаеть на г(оспод)а: и м(и)л(о)стью вышняго не подвижится.
9. Обрящется роука твоя всемь врагомь твоимъ, десница твоя обрящет
вся ненавидящая тобе.
10. Яко положиши ихъ яко пещь огньнноую во время лица твоего:
г(оспод)ь гневомь своимъ смятеть я, и снесть ихъ огнь.
11. Плод ихъ от земля погоубиши, и семя ихъ от с(ы)новъ ч(е)л(о)в(е)чьскых.
12. Яко оуклониша на тя злая, помыслиша с[о]веты, ихже не вьзмогоша съставити.
13. Яко положиши я хребетъ, въ избытцехъ своихъ оуготоваеши лице ихъ.
14. Вьзнесися г(оспод)и силою твоею: вьспоемь и поемъ силы твоя.

СЛАВА :

ПСАЛОМ 21
1. В конець, о застоупленьи оутренем, пс(а)л(ом) д(а)в(и)д(ов).

2. Б(ож)е, б(ож)е мои, вонми ми, вьскоую мя остави ; далече от сп(а)сения
моего словеса грехопадении моихъ.
3. Б(ож)е мои, въззовоу вь днехъ, и не оуслышиши, и в нощи, и не в безоумие мне.
4. Ты же вь с(вя)темь живеши, хвала из(раи)л(е)ва.
5. На тя оуповаша о(т)ци наши: оуповаша, и избавилъ еси ихъ.
6. К тобе возваша, и сп(а)сошася: на тя оуповаша, и не постыдешас[я].
7. Аз же есмь червь, и не ч(е)л(о)в(е)къ, поношение ч(е)л(о)в(е)камь,
и оуничижение людемь.
8. Вси видящеи мя пороугашамися, гл(агола)ша оустнами, покиваша главоу:
9. Оупова на г(оспод)а, да избавитъ и, да спасеть его, яко хощеть емоу.
10. Яко ты еси истергии мя ис чрева, оупованье мое от сесцю м(а)т(е)ре моея:
11. К тобе приверженъ есмь от ложеснъ, от чрева матери моея б(ог)ъ мои еси ты.
12. Не отстоупи от мене, яко скорбь близь, яко нес[ть] помогающаго ми.
13. Обыдоша мя телци мнози, оунци тоучнии одержаша мя:
14. Отверзоша на мя оуста своя, яко левъ, вьсхищая и рикая.
15. Яко вода излияся, и ра[з]сыпашася вся кости моя: быс[ть] с(е)рдце
мое яко воскъ тая посреде чрева моего.

16. И[з]сше яко скоудель крепость моя, и языкъ мои прилпе гортани моемоу,
и вь персть сьмерти свел мя еси.
17. Яко обиидоша мя пси мнози, снемь лоукавых одержаша мя:
ископаша роуце мои и нозе мои:
18. Исчетоша вся кости моя: ти же смотриша, и презреша мя.
19. Разьделиша ризы моя собе, о одежи моеи меташа жребия.
20. Ты же г(оспод)и не оудали помощи твоя от мене, на застоупление мое вонми.
21. Изми от ороужья доушю мою, и из роукы песия единородноую мою:
22. Сп(аси) мя от оустъ львовъ, и от рогъ единорожь сьмирение мое.
23. Повемь имя твое братии моеи, посреде ц(е)ркве в[о]спою тя.
24. Боящеися г(оспод)а, вьсхвалите и, все семя ияковле прославите и,
да оубоитжеся от него все семя из(раи)л(е)во:
25. Яко не оуничижи, ни негодова м(о)л(и)твы нищаго, ни отврати лица
своего от мене, и егда возвах к немоу, оуслыша мя.
26. От тебе похвала моя, вь ц(е)ркви велице исповемся тобе, м(о)л(и)твы
моя възъдамъ пред боящимися его.
27. Ядять нищии, и насытятся, и вьсхвалять г(оспод)а вьзискающеи ег[о]:
жива боудоуть с(е)рдца ихъ въ векъ века.
28. Помяноутся и обратяться кь г(оспод)оу вси конци земля, и поклонятся
пред нимь вся о[те]чьствия языкъ.
29. Яко г(оспод)не ес(ть) ц(а)рствие, и тъ обладаеть языкы.
30. Ядоша, и поклонишася вси тоучнии земля: пред нимь предпадоуть
вси нисходящеи вь землю, и д(у)ша моя томоу живеть.
31. И семя мое поработаеть емоу: вьзвестить г(осподе)ви род грядоущии:
32. И вьзвестять правдоу его людемь рождьшимся, ихже с[о]твори г(оспод)ь.

ПСАЛОМ 22
П(са)л(о)мъ д(а)в(и)д(о)въ.

1. Г(оспод)ь пасеть мя, и ничтоже мя лишить.
2. На месте злачне, тамо всели мя: на воде покоине вьспита мя.
3. Д(у)шю мою обрати, настави мя на стезя правы имени ради его.
4. Аще бо и поидоу посреде сенеи см(е)ртьныхъ, не оубоюся зла, яко
ты [со] мною еси: палица твоя и жезлъ твои, та мя оутешиста.
5. Оуготовалъ еси предомною тряпезоу, пред стоужающиихъ мне:
оумастилъ еси елеомь главоу мою, и чаша твоя оупояющи мя яко державна.
6. И м(и)л(о)сть твоя пож[е]неть мя вся дни живота моего:
вселитимися въ домъ г(осподе)нь въ долготоу днии.